انسداد دہشت گردی کی عدالت کے جج نے اڈیالہ جیل کے باہر سے گرفتار پی ٹی آئی رہنماؤں کو پیش نہ کرنے پر ایس پی کو توہین عدالت کا نوٹس جاری کردیا۔
ایکسپریس نیوز کے مطابق پاکستان تحریک انصاف کی جانب سے اڈیالہ جیل کے باہر سے گرفتار ہونے والے رہنماؤں کی رہائی کے حوالے سے انسداد دہشت گردی کی عدالت میں درخواست دائر کی گئی تھی۔
انسداد دہشت گردی کی عدالت کے جج امجد علی شاہ نے درخواست پر سماعت کی اور پولیس کو پی ٹی آئی رہنماؤں کو پیش کرنے کیلیے ساڑھے 7 بجے تک کا وقت دیا۔
مقررہ وقت کے بعد بھی پی ٹی آئی رہنماؤں کو پیش نہ کرنے پر اے ٹی سی نے ایس پی نبیل کھوکھر کو توہین عدالت کا نوٹس جاری کر دیا۔
عدالت نے ایس پی صدر کو صبح 9 بجے ذاتی حیثیت میں پیش ہوکر وضاحت کا حکم بھی دے دیا۔
