MUMBAI:
سری دیوی، جنہیں بھارتی سینما کی ملکہ کا درجہ حاصل تھا، اپنی غیر معمولی اداکاری اور وقار کے باعث فلم انڈسٹری میں بے حد عزت کی حامل تھیں۔
بالی ووڈ کے معروف ہدایت کار پنکج پراشر جنہوں نے سری دیوی کے ساتھ دو فلموں چال باز (1989) اور میری بیوی کا جواب نہیں (2004) میں کام کیا، نے حالیہ انٹرویو میں ان سے جڑی یادوں کو شیئر کیا۔
پراشر نے ماضی کا ایک واقعہ یاد کرتے ہوئے بتایا کہ ایک دن فلم سٹی میں ونود کھنہ، رشی کپور، رنجیت، اور شکتی کپور شوٹنگ میں وقفے کے دوران مٹن بریانی سے لطف اندوز ہو رہے تھے کہ اچانک کمرے میں سری دیوی داخل ہوئیں، ادکارہ پر نظر پڑتے ہی چاروں سینئر اداکار احترام میں کھڑے ہو گئے۔ انہوں نے کہا کہ ایسا لگا جیسے کوئی اعلیٰ فوجی جنرل اندر داخل ہوا ہو۔ یہ سری دیوی کی شخصیت اور مقام کا ثبوت تھا۔
پراشر نے مزید بتایا کہ ابتدا میں سری دیوی اپنے کام کے دوران پروفیشنل اور الگ تھلگ رہتی تھیں، لیکن جیسے ہی وہ ان کے وژن کو سمجھیں، ان کے رویے میں نمایاں تبدیلی آ گئی۔
چال باز میں ان کے دوہرے کرداروں نے انہیں بہترین اداکارہ کا فلم فیئر ایوارڈ دلایا، اور یہ فلم ان کی فنی عظمت کا ایک اور مظہر بن گئی۔
