اسلام آباد:
رواں مالی سال کے پہلے5 ماہ میں برآمدات کا حجم ڈیڑھ ارب ڈالر سے زائد اضافہ کیساتھ 13.72ارب ڈالر تک پہنچ گیا۔
ادارہ شماریات کے مطابق رواں مالی سال کے پہلے پانچ ماہ کے دوران ملکی برآمدات میں گزشتہ مالی سال کی اسی مدت کے مقابلے میں 12.82 فیصد اضافہ ہوا،اس دوران ٹیکسٹائل برآمدات 10.51 فیصد اضافہ سے 7.60 ارب ڈالر رہیں، جس میں ریڈی میڈ گارمٹس، نیٹ ویئر، بیڈ ویئر اور ملبوسات شامل ہیں۔
اس دوران غذائی اشیا کی برآمدات 9.58 فیصد اضافے سے 3.15 ارب ڈالر سے زائد رہیں، چاول کی برآمدات میں 35.4 فیصد اضافہ ہوا۔
اس دوران1.51ارب ڈالر مالیت کے چاول برآمد کئے گئے، چینی کی برآمد 833 فیصد بڑھ کر19.67کروڑ ڈالر تک پہنچ گئی۔
تمباکو، پھل، سبزیوں اور گوشت کی برآمدات میں بھی اضافہ ہوا، تاہم دالوں، آئل سیڈز، گرم مصالحے اور میوہ جات کی برآمدات میں کمی ہوئی۔
مینوفیکچرنگ یا صنعتی برآمدات کا حجم 54 فیصد اضافہ سے1.76 ارب ڈالر رہا، چمڑے اور پلاسٹک مصنوعات، گلوز،ادویات اور سیمنٹ کی برآمدات بھی بڑھی تاہم کھیلوں کے سامان ، کارپٹ، فرنیچر کی برآمدات میں کمی آئی۔
رواں مالی سال پاکستانی برآمدات کا ہدف 32 ارب ڈالر سے زائد ہے۔
